Mabahong Lipunan

Sino ito

Na sa kapangyarihan ay sugapa?

Lahat-lahat ay gagawin niya

Ultimo pagkitil buhay ng kapwa

Sino ito

Na isa raw relihiyosa?

Kunwaring sa Itaaas nakatingala

Ngunit pailalim naman kung tumira

Sino ito

Na kayamana’y ipinagyayabang sa madla?

Akala mo’y pinaghirapan niya

Ang lahat ay nakaw lang pala

Sino ito

Na may mukhang kaaya-aya?

Subalit tulad ng relihiyosa

'Pag talikod ay may halimaw na mukha

Sino ito

Na ubod ng talas ang mga salita?

Ngunit 'pag nakikita kaniyang mga biktima

Umuurong lagi matabil niyang dila

Sino ito

Na hanapbuhay ay letra at tinta?

Siya ay naguumapaw sa salita

Kapos naman sa gawa

Sino ito

Na karangyaa'y pinagkait raw sa kanya?

Sa hirap ng buhay 'di raw siya makawala

Kung kaya't namemerwisyo nalang ng kapwa

Sino ito

Na sa mga bato'y sumasamba?

At sa tuwing tinataaman na

Madalas ay nauuwi sa trahedya

Sino ito

Na sa laman ay humahalina?

Kapag kaniyang gusto ay nakuha

Walang labang nilalang, iniiwang basta

Sino ako

Na kailanma'y 'di mo makikita?

Kumakalam ang aking sikmura

Oras na upang sa "trono" ako'y pumunta

Lahat ng ito’y pawang isip-katha

Mapaglarong imahinasyong walang magawa

Ako'y hindi na dapat patulan pa

Kung malawak naman ang pang-unawa

‘Di ko nais ika’y mabahala

Ipagpaumanhin aking isip na malaya

‘Pagkat lahat ng ito’y nagawa

Habang sa inidoro ako ay abala